မန်နေဂျာ

 မန်နေဂျာ တစ်ဦး၏ 

လိုအပ်သော အရည်အချင်းများ

∆∆∆∆∆∆∆∆∆∆∆∆∆∆∆∆∆

 ကျွန်တော် ဒီနေ့ဆွေးနွေးချင်တာကတော့ မန်နေဂျာတစ်ဦးမှာ ရှိသင့်၊ ရှိထိုက်တဲ့ အရည်အချင်းနှင့် အရည်အသွေးအကြောင်းပဲ ဖြစ်ပါတယ်။

 

အခြေခံအားဖြင့် မန်နေဂျာတစ်ဦးမှာ သူရဲ့အဖွဲ့အစည်းကို ဦးဆောင်နိုင်ဖို့ Leadership လို့ခေါ်တဲ့ ခေါင်းဆောင်မှုစွမ်းရည်နဲ့ Management လို့ခေါ်တဲ့ စီမံခန့်ခွဲမှု စွမ်းရည်တွေ ရှိဖို့လိုအပ်ပါတယ်။ 

အဲ့ဒါတွေ လုပ်နိုင်ဖို့ဆိုရင် သူ့မှာ Hard Skill လို့ခေါ်တဲ့ လုပ်ငန်းပိုင်းဆိုင်ရာ ကျွမ်းကျင်မှုနဲ့ Soft Skill လို့ခေါ်တဲ့ ပေါင်းသင်းဆက်ဆံရေးမှအစ အခြားစိတ်ဓတ်ရေးရာ အပိုင်းတွေမှာပါ ကျွမ်းကျင်မှုရှိမှသာ အပေါ်မှာပြောထားတဲ့ စွမ်းရည် (၂) ခုနဲ့ ပြည့်စုံတဲ့ မန်နေဂျာကောင်းတစ်ယောက် ဖြစ်လာနိုင်မှာပါ။ 

ဥပမာ - ဆိုကြပါစို့... လုပ်ငန်းခွင်မှာ မန်နေဂျာတစ်ဦးက သူ့ရဲ့လုပ်ငန်းပိုင်းဆိုင်ရာတွေမှာ ပြောစရာမရှိအောင်တော်နေ တတ်နေပါတယ်၊ 

ဒါပေမယ့်လည်းသူက သူရဲ့လက်အောက်၀န်ထမ်းတွေအပေါ်မှာတော့ ပေါင်းသင်းဆက်ဆံရေးမကောင်းဘူး၊ ဆုံးဖြတ်ချက်ခိုင်ခိုင်မာမာ မချပေးနိုင်ဘူး၊ ဘာအခွင့်အလမ်းမှ မပေးဘူး၊ အမြဲပြစ်တင် ပြောဆိုနေမယ်ဆိုရင် သူ့၀န်ထမ်းတွေက သူ့ဆီမှာ မပျော်တော့ဘူး။ အလုပ်ထွက်ချင်လာမယ် … 

အဲဒီလိုတွေဖြစ်လာတာဟာ မန်နေဂျာ Soft Skills ညံ့ဖျင်းမှုကြောင့်သာဖြစ်တယ်။ နောက်တစ်ခုက မန်နေဂျာတစ်ဦးက အရမ်းသဘောကောင်းပြီး စိတ်ဓါတ်ရေးရာတွေမှာ အ ပြစ်ပြောစရာ မရှိပေမယ့် လုပ်ငန်းပိုင်းဆိုင်ရာ ကျွမ်းကျင်မှုမရှိဘူး၊ 

Technical ပိုင်းဆိုင်ရာ Upgrade တွေ သိမနေဘူး၊ ဆက်စပ်မှုရှိနေတဲ့အပိုင်းတွေကိုလည်း မလေ့လာထားဘူးဆိုရင်လည်း သူ့၀န်ထမ်းတွေက သူ့ဆီမှာ မပျော်တော့ဘူး။ အလုပ်ထွက်ချင်လာမယ်။ အဲဒါဘာကြောင့်လဲဆိုရင် လုပ်ငန်းခွင်မှာ သူတို့အတွက် တိုးတက်မှုမရှိနိုင်လို့ ထွက်ကြတာဖြစ်တယ်။ 

ဒါကလည်း မန်နေဂျာတစ်ဦးမှာ ရှိသင့်ရှိထိုက်တဲ့ Hard Skills မရှိနေလို့သာ ဖြစ်တယ်။ မန်နေဂျာ အများစုကတော့ အောက်ခြေ Operational Level က တက်လာတာဖြစ်လို့ Hard Skills က ပါလာကြပြီးသားပါ။ 

ဒါပေမယ့်လည်းအချို့သော မန်နေဂျာတွေက ငါမန်နေဂျာဖြစ်လာပြီ ဘာမှ လေ့လာသင်ယူစရာမလိုတော့ဘူးလို့ ထင်နေကြပါတယ်။ ဒါဟာ လုံး၀မှားယွင်းတဲ့ အယူအဆဖြစ်ပါတယ်။ ကမ္ဘာကြီးတိုးတက် ပြောင်းလဲလာတာနဲ့အမျှ ခေတ်ရေစီးကြောင်းကလည်း ပြောင်းလဲလာတာပါ .. 

အဲဒီလိုပဲ ကိုယ်သိ၊ ကိုယ်တတ်ထားတဲ့ပညာရပ်တွေကလည်း ခေတ်အလိုက်ပြောင်းလဲလာပါတယ်။ မန်နေဂျာ Level မှာ Technical ပိုင်းအနေနဲ့ ကိုယ်ကိုယ်တိုင် ၀င်လုပ်စရာမလိုပေမယ့် လမ်းညွှန်မှု ပေးနိုင်ဖို့အတွက် သက်ဆိုင်ရာ အတတ်ပညာ၀မ်းစာ ထပ်ထပ်ဖြည့်ဖို့ လိုအပ်ပါတယ်။

အိုကေ... ဒါဆို ကျွန်တော်တို့ မန်နေဂျာကောင်းတစ်ဦးမှာ လိုအပ်တဲ့အရည်အချင်းတွေအကြောင်း ဆက်ပြောရအောင်။

မန်နေဂျာတစ်ဦးက ခေါင်းဆောင်ကောင်းဖြစ်ဖို့ လိုအပ်သလို စီမံခန့်ခွှဲမှုအပိုင်းလည်း ကျွမ်းကျင်ဖို့ လိုအပ်ပါတယ်။ သူဦးဆောင်နေရတဲ့ဌာနအတွက် သွားမယ့် Directions တွေ Goals တွေ သူကိုယ်တိုင် ချမှတ်နိုင်ပြီး ရလာမယ့် Outcome အပေါ်မှာလည်း သူကိုယ်တိုင် တာ၀န်ခံစိတ်၊ တာ၀န်ယူစိတ်ရှိရမယ်။ 

ဒါမှလည်း သူ့လက်အောက်၀န်ထမ်းတွေက သူ့အပေါ် ယုံကြည်မှုရှိလာပြီး နောက်ကတစ်ပါတည်း ပါလာမှာပါ။ ပါလာတဲ့၀န်ထမ်းတွေကိုလည်း သူတို့ရဲ့ တိုးတက်မှုအလိုက် မကြာခဏ ချီးကျူးစကားပြောပေးဖို့ လိုပါတယ်။ 

ပြီးတော့ လုပ်ငန်းနဲ့ပတ်သက်တဲ့ စိန်ခေါ်မှုအသစ်တွေကိုလည်း အမြဲကြိုဆိုနေရမယ်။ ဒါမှသာလျှင် မိမိအပါအ၀င် လက်အောက်၀န်ထမ်းတွေက စိန်ခေါ်မှုအသစ်တွေကြောင့် စိတ်ဓါတ် တက်ကြွလာပြီး စိတ်လှုပ်ရှားစရာကောင်းတဲ့ အလုပ်ပတ်၀န်းကျင်တစ်ခုကိုလည်း ဖန်တီးပြီးသား ဖြစ်မှာပါ။ 

ဒါဆိုရင် ၀န်ထမ်းတွေရဲ့ နေ့ရက်တိုင်းကလည်း စိတ်၀င်စားစရာကောင်းနေမှာပါ။ ဒီနည်းအားဖြင့် မိမိဌာနရဲ့ အလုပ်ထွက်မှုနှုန်း (Turnover Rate) ကိုလည်း ထိန်းပြီးသားဖြစ်ပါတယ်။ ဒါကလည်း မန်နေဂျာကောင်း တစ်ဦးရဲ့ အရည်အချင်းတစ်ခုပါ။ 

မန်နေဂျာတစ်ဦးမှာ လုပ်ငန်းပိုင်းဆိုင်ရာ Structure တွေကိုလည်း ကောင်းကောင်းသိဖို့လိုပါတယ်။

# မိမိဌာနအတွက် Department Structure သေသေချာချာရှိပြီလား? 

# တစ်ယောက်ချင်းရဲ့ JD ရှိရဲ့လား? 

# ယခုလက်ရှိသွားနေတဲ့ Project က ဘယ်လို Structure နဲ့ သွားနေတာလဲ? 

# မိမိ ၀န်ထမ်းတွေကရော ဒါကိုနားလည်သဘောပေါက်ရဲ့လား? 

*** ဒါတွေကို သေသေချာချာသိပြီဆိုမှ သူတို့ကို Guideline ကောင်းကောင်း ပေးလို့ရမှာပါ။ 

အဲ့ဒါတွေသိပြီဆိုရင်တော့ မန်နေဂျာတစ်ဦးအနေနဲ့ Big Picture ကိုလည်း မသိလို့ မရပါဘူး။ 

- မိမိလုပ်မယ့်လုပ်ငန်းစဉ်ရဲ့ ရှေ့မှာဘာတွေဖြစ်နိုင်မလဲ? ဘယ်ထိအောင်ကြိုပြင်ထားဖို့ လိုမလဲ?

- ဘယ်လိုပြသနာတွေဖြစ်လာရင် ဘယ်လိုဖြေရှင်းမလဲ? 

စတာတွေကိုရေရှည်အတွက် ကြိုတင်မှန်းဆ ပြင်ဆင်ထားရပါမယ်။

နောက်တစ်ခုက မန်နေဂျာတွေမှာ Commitment လို့ခေါ်တဲ့ စိတ်ရောကိုယ်ပါနှစ်ပြီး ပန်းတိုင်ထိရောက်အောင်သွားတဲ့ စိတ်ဓါတ်မျိုးလည်း ပိုင်ဆိုင်ရပါမယ်။ 

အဲ့ဒီိလိုသွားဖို့ ကိုယ့်လက်အောက်၀န်ထမ်းတွေကိုပါ ဆွဲခေါ်ပြီး စုပေါင်းလုပ်ဆောင်လို့ရတဲ့ အောင်မြင်မှုဆိုတာ ဘာလဲဆိုတာ ပြရမယ်။ 

ဒါမှသာ သူတို့လည်း Commitment ကို နားလည်သဘောပေါက်ပြီး အရည်အသွေးတိုးတက်လာမှာဖြစ်တယ်။ Commitment နဲ့ အတူတွဲကပ်ပြီးပါလာတာ ဘာလဲဆိုရင် Creative Thinking လို့ခေါ်တဲ့ စိတ်ကူးဥာဏ်ဖန်တီးမှုနဲ့ Innovation လို့ခေါ်တဲ့ တီထွင်ဆန်းသစ်မှုတွေဖြစ်တယ်။ 

ရှေးရိုးမန်နေဂျာတစ်ဦးလို ဘောင်တစ်ခုထဲမှာသာနေပြီး ဘာဖန်တီးမှု၊ ဘာဆန်းသစ်မှုမှ ရှိမနေုရင် ဒီခေတ် ဒီနေရာမှာအရိုးဆွေးပြီး ကျန်ခဲ့မှာဖြစ်ပါတယ်။ 

အရေးကြီးတဲ့ နောက်တစ်ချက်ကတော့ Knowledge ပဲဖြစ်တယ်။ ဒါက ငါတို့ဌာနနဲ့မဆိုင်ပါဘူး၊ ငါတို့သိစရာမလိုပါဘူးဆိုရင် သေချာတယ် အဲ့ဒီမန်နေဂျာ မကြာခင်ကျန်ခဲ့တော့မယ်။ 

မိမိကိုယ်တိုင် ကျွမ်းကျင်စရာမလိုပေမယ့် ပြင်ပဗဟုသုတအနေနဲ့တော့ အဆက်ပြတ်လို့မရပါဘူး။ ကိုယ့်လုပ်ငန်းခွင်နဲ့ ပတ်သက်တဲ့ Knowledge ဆို ပိုလို့တောင်စုစည်းသင့်ပါတယ်။ တိုက်ရိုက်မဆိုင်ပေမယ့် သွယ်ဝိုက်သော နည်းနဲ့ ပတ်သက်နေရတယ်ဆိုရင် သက်ဆိုင်ရာ Seminar တွေကို စဉ်ဆက်မပြတ် တက်နေရမှာ ဖြစ်ပါတယ်။ 

မန်နေဂျာကောင်းတစ်ဦးဖြစ်ဖို့အတွက် လိုအပ်တဲ့ အရည်အချင်းတွေကတော့....

1) Technical Skill

မန်နေဂျာတစ်ဦးမှာ မိမိနဲ့သက်ဆိုင်တဲ့ လုပ်ငန်းပိုင်းဆိုင်ရာ လုံလောက်တဲ့ Technical Skill တွေ မဖြစ်မနေ သိထားဖို့လိုပါတယ်။ ဒါမှသာ မိမိလက်အောက်၀န်ထမ်းတွေကို လိုအပ်တဲ့သင်ပြမှု၊ လမ်းညွှန်မှုတွေ ပေးနိုင်မှာဖြစ်ပါလို့၊ အကယ်၍ မိမိမှာ လိုအပ်ချက်တွေရှိနေသေးရင် အမြန်ဆုံးဖြည့်သင့်ပါတယ်။

2) Conceptual Skill

မန်နေဂျာတစ်ဦးမှာ ဆင်ခြင်တွေးတောခြင်းနှင့်ဆိုင်တဲ့ ကျွမ်းကျင်မှုရှိရပါမယ်။ ဒါမှသာ မိမိ၀န်ထမ်းတွေကို စီမံခန့်ခွဲတဲ့နေရာမှာ အကျိုးအကြောင်းဆီလျော်စွာနဲ့ ဒီလိုဆို မသင့်လျော်ဘူး၊ ဒါလေးဆို ပိုကောင်းမယ်၊ ဒါကိုတော့ဖြင့် ဘာကြောင့်ပြုလုပ်သင့်တယ် စသည်အားဖြင့် မိမိကဦးဆောင်သူအနေနဲ့ ဘက်ပေါင်းစုံက စဉ်းစားပြီး လမ်းပြနိုင်မှာ ဖြစ်ပါတယ်။

3) Interpersonal Skill

လူအချင်းချင်းအပြန်အလှန် လူသားဆန်တဲ့ လူမှုပေါင်းသင်းဆက်ဆံရေး ကျွမ်းကျင်မှုကလည်း မန်နေဂျာတစ်ဦးရဲ့ မရှိမဖြစ်လိုအပ်တဲ့ Skill တစ်ခုပါ။ ဒီ Skill က Manager Level မှ မဟုတ်ပါဘူး Operational Level ရော Top Management Level မှာပါ မရှိမဖြစ်လိုအပ်တဲ့၊ အရေးပါတဲ့ Skill တစ်ခုပါ။ 

မိမိကိုယ်မိမိ ယုံကြည်မှုအပြည့်ရှိပြီး Organization ထဲမှာရှိတဲ့ ကိုယ်နဲ့အတူ ပူးပေါင်းလုပ်ဆောင်မယ့် သူတွေကိုလည်း ထိရောက်တဲ့ Relationship တည်ဆောက်နိုင်ရမယ်။ Work Ethic လို့ခေါ်တဲ့ လုပ်ငန်းပိုင်းဆိုင်ရာ စောင့်စည်းရမယ့် ကျင့်၀တ်တွေကိုလည်း ထိန်းသိမ်းရမယ်။

 မိမိက အခြားသူတွေအပေါ်မှာလည်း Positive Attitude လို့ ခေါ်တဲ့ အကောင်းမြင်ဝါဒ ရှိနေဖို့ အရမ်းအရေးကြီးပါတယ်။ အဲ့ဒီနောက်မှာတော့ Negotiation Skill ဆိုတဲ့ ညှိနှိုင်းမှုတွေလုပ်ပေးရတဲ့နေရာတွေ၊ Decision Making Skill ဆိုတဲ့ ဆုံးဖြတ်ချက် ချပေးရတဲ့နေရာတွေ၊ Problem Solving Skill လို့ဆိုတဲ့ပြဿနာကို ကိုင်တွယ်ဖြေရှင်းပေးတဲ့ နေရာတွေမှာ ကျွမ်းကျင်မှန်ကန်စွာ ဆောင်ရွက်ပေးနိုင်မှာ ဖြစ်ပါတယ်။

4) Team Building Skill

မန်နေဂျာကောင်းတစ်ဦးဖြစ်လာဖို့ဆိုရင် မိမိရဲ့ Team လေးကို အဖွဲ့အစည်း စိတ်ဓါတ်ကိုယ်စီလေးနဲ့ သူ့အလုပ်၊ ကိုယ့်အလုပ် မခွဲခြားဘဲ စည်းစည်းလုံးလုံး ခိုင်ခိုင်မာမာတည်ဆောက်နိုင်မှ ဖြစ်ပါမယ်။ အဲ့ဒီလိုဖြစ်ဖို့ မိမိကိုယ်တိုင်က ဦး  ဆောင်ပြီး လက်အောက်၀န်ထမ်းတွေ အပေါ်မှာလည်း မျက်နှာမလိုက်ပဲ တပြေးတညီတည်း ဆုံးဖြတ်ချက် ခိုင်မာစွာနဲ့ လျှောက်လှမ်းရပါမယ်။

 

5) Leadership Skill

ခေါင်းဆောင်မှုစွမ်းရည် ကျွမ်းကျင်မှုကတော့ အရေးပါဆုံးလို့ ဆိုရပါမယ်။ ခေါင်းဆောင်ကောင်းတစ်ယောက်က မိမိလက်အောက်၀န်ထမ်းတွေကို ကောင်းမွန်စွာဦးဆောင်နိုင်ပြီး Motivation လည်း အမြဲပေးနိုင်ရမယ်။

 မိမိ၀န်ထမ်းတွေအပေါ်မှာ လေးစားယုံကြည်မှုရှိပြီး Innovator တွေလည်း ဖြစ်ဖို့လိုပါတယ်။ ဒါမှ ဆန်းသစ်မှုတွေကို ရှေ့ကဦးဆောင်လမ်းပြနိုင်မှာဖြစ်ပါတယ်။ ခေတ်နဲ့လျော်ညီစွာ ခေါင်းဆောင်နိုင်တဲ့သူတွေက ဘယ်တော့မှ နောက်ကျမကျန်ခဲ့ဘူးဆိုတာ အမြဲသတိရနေဖို့လိုပါတယ်။

နောက်ဆုံးတစ်ခုကတော့ မန်နေဂျာတွေအနေနဲ့ မိမိဌာနက လက်အောက်၀န်ထမ်းတွေကို အရည်အချင်းပြည့်မှီလာအောင် Train ပေးတာလည်း မန်နေဂျာကောင်းတစ်ဦးရဲ့ အရည်အချင်းတစ်ခုပါ၊ 

မိမိကိုယ်တိုင်လည်း သင်ယူမှုတွေ ဆက်တိုက်လုပ်နေရမှာဖြစ်သလို မိမိ၀န်ထမ်းတွေကိုလည်း စဉ်ဆက်မပြတ် သင်ကြားမှုတွေပြုလုပ်ပေးခြင်းဟာ မန်နေဂျာကောင်းတစ်ယောက်ရဲ့ ရှိသင့်ရှိထိုက်တဲ့ အရည်အချင်းကောင်းတစ်ခုဖြစ်တယ်ဆိုတာ မျှဝေရင်း မန်နေဂျာ ကောင်းတစ်ဦးရဲ့ လိုအပ်သောအရည်အချင်းများ ဆောင်းပါးကို အဆုံးသတ်လိုပါတယ်။

စာဖတ်သူ မိတ်ဆွေများလည်း အသိပညာ၊ အတတ်ပညာများ ဆတက်ထမ်းပိုး တိုးတက်ကြပါစေလို့ ဆုမွန်ကောင်း တောင်းလိုက်ပါတယ်။

Credit:

CANDESCENT Business Solution / Oasis